第13頁

請關閉瀏覽器的閱讀/暢讀/小說模式並且關閉廣告遮蔽過濾功能，避免出現內容無法顯示或者段落錯亂。

黃二姐又吸了一口水煙，慢慢說道：“倪翠鳳脾氣是匆大好，也怪勿得耐羅老爺要動氣。其實倪翠鳳脾氣末有點，也看客人起，俚來裡羅老爺面浪，倒勿曾發過歇一點點脾氣囗。湯老爺末也曉得點俚哉。俚做仔一戶客人，要客人有長性，可以一直做下去，故末俚搭客人要好哚。俚搭客人要好仔，陸裡有啥脾氣嗄？俚就碰著仔無長性客人，難末要鬧脾氣哉。俚鬧起脾氣來，（要勿）說啥勿肯巴結，索性理也勿來理耐（口宛）。湯老爺阿是？第歇耐羅老爺末好像倪翠鳳勿巴結了動氣，陸裡曉得倪翠鳳心裡搭羅老爺倒原蠻要好，倒是耐羅老爺勿是定歸要去做俚，俚末也勿好來陪巴結耐哉（口宛）。俚也曉得蔣月琴搭羅老爺做仔四五年哉，俚有辰光搭我說起，說：‘羅老爺倒有長性哚，蔣月琴搭做四五年末，來裡倪搭做起來阿會推扳嗄？’我說：‘耐曉得羅老爺有長性末，為啥勿巴結點囗？’俚也說得勿差，俚說：‘羅老爺有仔老相好，只怕倪巴結匆上，倒落仔蔣月琴哚笑眼裡。’俚是實概意思。要說是俚勿肯巴結耐羅老爺，倒冤枉仔俚哉。我說羅老爺，耐故歇坎坎做起，耐也匆曾曉得倪翠鳳個脾氣，耐做一節下來，耐就有數目哉。倪翠鳳末也曉得耐羅老爺心裡是要做俚，難末俚慢慢仔也巴結起來哚。”

子富聽了，冷笑兩聲。黃二姐也笑道：“阿是耐有點勿相信我閒話？耐問聲湯老爺看，湯老爺蠻明白哚。湯老爺，耐想囗，倘然俚搭羅老爺勿要好末，羅老爺陸裡叫得到十幾個局嗄？俚心裡來哚要好，嘴裡終勿肯說出來，連搭孃姨、大姐哚才匆曉得俚心裡個事體，單有我末稍微摸著仔點。倘然我故歇放羅老爺去仔，晚歇俚轉來就要埋冤我哉（口宛）。我老實搭羅老爺說仔罷：俚做大生意下來，也有五年光景哉，通共就做仔三戶客人，一戶末來裡上海，還有兩戶，一年上海不過來兩埭，清爽是清爽得野哚。我再要俚自家看中仔一戶客人，搭我多做點生意，故是難殺哚囗。推扳點客人（要勿）去說哉，就算客人末蠻好，俚說是無長性，只好拉倒，教我阿有啥法子嗄？為此我看見俚搭羅老爺蠻要好末，望羅老爺一直做下去，我也好多做點生意。勿然是老實說，像羅老爺個客人到倪搭來也勿少（口宛），走出走進，讓俚哚去，我阿曾去應酬歇？為啥單是耐羅老爺末要我來陪陪耐嗄？”

子富仍是默然，湯嘯庵也微微含笑。黃二姐又道：“羅老爺做末做仔半個月，待倪翠鳳也總算無啥，不過倪翠鳳看仔好像羅老爺有老相好來哚，倪搭是墊空個意思。我倒搭俚說：‘耐也巴結點，有啥老相好、新相好，羅老爺阿會待差仔倪嗄？’俚說：‘隔兩日再看末哉。’前日仔俚出局轉來，倒搭我說道：‘無(女每)，耐說羅老爺搭倪好，羅老爺到仔蔣月琴搭吃酒去哉。’我說：‘多吃臺把酒是也算勿得啥。’陸裡曉得倪翠鳳就多心哉囗，說：‘羅老爺原搭老相好要好末，阿肯搭倪要好嗄？’”

子富聽到這裡，不等說完，接嘴道：“故是容易得勢，就擺起來吃一臺末哉（口宛）。”黃二姐正色道：“羅老爺耐做倪翠鳳，倒也匆在乎吃酒勿吃酒。（要勿）為仔我一句閒話，吃仔酒了，晚歇翠鳳原不過實概，例說我騙耐。耐要做倪翠鳳末，耐定歸要單做倪翠鳳一個哚，包耐十二分巴結，無撥一點點推扳。（要勿）做做倪翠鳳，再去做做蔣月琴，做得兩頭勿討好。耐勿相信我閒話，耐就試試看，看俚那價功架，阿巴結勿巴結。”子富笑道：“故也容易得勢，蔣月琴搭就匆去仔末是哉（口宛）。”黃二姐低頭含笑，又吸了一口水煙，方說道：“羅老爺，耐倒也會說笑話哚！四五年老相好，說勿去就匆去哉，也虧耐說仔出來。倒說道容易得勢，阿是來騙騙倪？”一面說，一面放下水煙筒，往對過房間裡做什麼去了。

子富回思陶雲甫之言不謬，心下著實欽慕；要與湯嘯庵商量，卻又不便。自己忖度一番，坐起來呷口茶。珠鳳忙送過水煙筒，子富仍搖手不吸。只見小阿寶和金鳳兩個爬在梳妝檯前，湊近燈光，攢頭搭頸，又看又笑。子富問：“啥物事？”金鳳見問，劈手從小阿寶手中搶了，笑嘻嘻拿來與子富看，卻是半個胡桃殼，內塑著五色粉捏的一出春宮。子富呵呵一笑。金鳳道：“耐看囗。”拈著殼外線頭抽拽起來，殼中人物都會搖動。湯嘯庵也踅過來看了看，問金鳳道：“耐阿懂嗄？”金鳳道：“葡萄架（口宛），阿有啥勿懂。”小阿寶忙笑阻道：“耐（要勿）搭俚說囗，俚要討耐便宜呀。”說笑問，黃二姐又至這邊房裡來，因問：“耐哚笑啥？”金鳳又送去與黃二姐看。黃二姐道：“陸裡拿得來嗄？原搭俚放好仔，晚歇弄壞仔末再要撥俚說哉。”金鳳乃付與小阿寶將去收藏了。

羅子富立起身，丟個眼色與黃二姐，同至中間客堂，不知在黑暗裡說些甚麼。

咕唧了好一會，只聽得黃二姐向樓視窗問：“羅老爺管家阿來裡？教俚上來。”一面見子富進房，即叫小阿寶拿筆硯來央湯嘯庵寫請客票，只就方才同席的胡亂請幾位。黃二姐親自去點起一盞保險檯燈來，看著嘯庵草草寫畢，給小阿寶帶下，令外場去請。

黃二姐向子富道：“耐管家等來裡，阿有啥說嗄？”子富說：“叫俚來。”高升在外聽喚，忙掀簾進門候示。子富去身邊取出一串鑰匙，吩咐高升道：“耐轉去到我床背後開第三隻官箱，看裡面有隻拜盒拿得來。”高升接了鑰匙，領命而去。

黃二姐問：“檯面阿要擺起來？”子富抬頭看壁上的掛鐘，已至一點二刻了，乃說：“擺起來罷，天勿早哉。”湯嘯庵笑道：“啥要緊！等翠鳳出局轉來仔，正好。”黃二姐慌道：“催去哉。俚哚是牌局，要末來哚替碰和，勿然陸裡有實概長遠嗄。”隨喊：“小阿寶，耐去催催罷，教俚快點就轉來。”小阿寶答應，正要下樓。黃二姐忽又叫住道：“耐慢點，我搭耐說囗。”說著，急趕出去，到樓梯邊和小阿寶咬耳朵叮囑幾句，道：“記好仔。”

小阿寶去後，黃二姐方率領外場調桌椅、設杯署，安排停當。請客的也回來口話。惟朱藹人及陶氏昆仲說就來，其餘有回去了的，有睡下了的，都道謝謝。羅子富只得罷了。

忽聽得樓下有轎子抬進大門，黃二姐只道是翠鳳，忙向樓視窗望下觀看。原來是客轎，朱藹人來了。羅子富迎見讓坐。朱藹人見黃翠鳳又不在家，解不出吃酒的緣故，悄問湯嘯庵方始明白。

三人閒談著，直等至兩點鐘相近，才見小阿寶喘吁吁的一徑跑到房間裡，說：“來哉，來哉！”黃二姐說：“跑啥？”小阿寶道：“我要緊呀，先生極得來。”黃二姐道：“啥實概長遠嗄？”小阿寶道：“來哚替碰和。”黃二姐道：“我說是替碰和（口宛），阿是猜著哉。”接著一路“咭咭咯咯”的腳聲上樓，黃二姐忙迎出去。先是趙家(女每)提著琵琶和水煙筒袋進來見了，叫聲“羅老爺”，笑問：“來仔一歇哉？倪剛剛勿巧，出牌局，勿催仔再有歐囗。”隨後，黃翠鳳款步歸房，敬過瓜子，卻回頭向羅子富嫣然展笑。子富從未見翠鳳如此相待，得諸意外，喜也可知。